ႁပ်ႉတွၼ်ႈ လွင်ႈလႅၵ်ႈလၢႆႈ: သၢင်ႇႁၢင်ႈမိူဝ်ႈၽုၵ်ႈ တႄႇမိူဝ်ႈၼႆႉၵႂႃႇလႄႈ

တီႈၼႂ်းၶႂၢင်ႇတူင်ႇဝူင်း ၻီႊၵျီႊထႄႊလ် ဢၼ်လႅၵ်ႈလၢႆႈၽႂ်းၶၼ်ၼင်ႇ ၼႂ်းဝၼ်းမိူဝ်ႈလဵဝ်ၼႆႉ တွၼ်ႈတႃႇၵႄႈလိတ်ႈ ပၼ်ႁႃၵူႈၸိူဝ်းၸိူဝ်း ၵဵဝ်ႇလူၺ်ႈၸုမ်းတူင်ႇဝူင်းၵူၼ်းၼၼ်ႉ လွၵ်းလၢႆးပၢႆး ပိင်ႇၺႃႇလႆႈၶဝ်ႈပႃးမႃးၼႂ်းၶၵ်ႉတွၼ်ႈဢၼ်လမ်ႇလွင်ႈဝႆႉယူႇယဝ်ႉ။ ၼႂ်းၵႃႈလွၵ်းလၢႆးပၢႆးပိင်ႇၺႃႇ ဢၼ်တႄႇႁုၼ်ႈမုၼ်းမႂ်ႇၸိူဝ်းၼၼ်ႉၸိုင် ၶဝ်ႈပႃးဝႆႉ ဢႅပ်ႊပလီႊၵေႊသျိၼ်ႊ ဢၼ်မီးၸိုဝ်ႈဝႃႈ “Change” မီးတီႈပွင်ႇဝႃႈ “လႅၵ်ႈလၢႆႈ” ၼႆသေ ပဵၼ်တွၼ်ႈတႃႇ ပိုၼ်ၽႄ ပိုၼ်ႉႁူႉလႄႈ ယုၵ်ႉမုၼ်းၼမ်ႉၵတ်ႉ ၵဵဝ်ႇလူၺ်ႈပႆၢးယူႇလီ လွင်ႈသိုပ်ႇသၢႆၸိူဝ်ႉၶိူဝ်း တမ်ႈတီႈသႅၼ်းပၢၼ်သိၵ်ႉႁိၵ်ႉၶဝ်ယူႇယဝ်ႉ။ ဢႅ ပ်ႊပလီႊၵေႊသျိၼ်ႊ ဢၼ်ၼႆႉ ယိူင်းဢၢၼ်းႁႂ်ႈပဵၼ် တွၼ်ႈတႃႇၶၢမ်ႈပူၼ်ႉဢွၵ်ႇလႆႈ ၼႂ်းၵႄႈလွင်ႈႁႄႉႁၢမ်ႈ၊ ပဵၼ်တွၼ်ႈတႃႇပိုၼ်​ၽႄ မႅင်ႇပၼ်ၶေႃႈ မုၼ်း လႄႈ ပဵၼ်တွၼ်ႈတႃႇ ယုၵ်ႉမုၼ်း ပိူင်ၾၢင်ႈႁၢင်ႈ လွင်ႈယူႇသဝ်း ဢၼ်ယူႇလီသိူဝ်းမူၼ်ႈ ၼၼ်ႉယူႇယဝ်ႉ။

ဢႅပ်ႊပလီႊၵေႊသျိၼ်ႊ “Change” “လႅၵ်ႈလၢႆႈ” ၼႆႉ ယိူင်းဢၢၼ်းပိူင်လူင်ၸမ်ႉ ပဵၼ်တွၼ်ႈတႃႇၵဵပ်းႁွမ်ၶေႃႈမုၼ်း ပႆၢးယူႇလီ ဢၼ်ၵဵဝ်ႇလူၺ်ႈ လွင်ႈၸၢႆး/ယိင်းလႄႈ လွင်ႈသိုပ်ႇသၢႆၸိူဝ်ႉၶိူဝ်း သႅၼ်းပၢၼ်သိၵ်ႉႁိၵ်ႉ  ဢၼ်ပိူင်ႈႁၢင်ႇၵၼ်ဝႆႉၼၼ်ႉယဝ်ႉ။ ႁဵတ်းသၢင်ႈဝႆႉပၼ် ႁႂ်ႈပေႃးယိုၼ်းၶိုတ်းထိုင်လႆႈ လွင်ႈတၢင်းဢိၵ်ႇ တင်းၶေႃႈမုၼ်း ဢၼ်ၵိုင်ႇလႅပ်ႈၵၼ်တင်းသႅၼ်းပၢၼ်သေ ၸႂ်ႉတိုဝ်းဝႆႉလိၵ်ႈတႆး၊ လိၵ်ႈမၢၼ်ႈ လႄႈ လိၵ်ႈဢင်းၵိတ်း သၢမ်ၽႃႇသႃႇယူႇယဝ်ႉ။

ဢႅပ်ႊပလီႊၵေႊသျိၼ်ႊဢၼ်ၼႆႉၼၼ်ႉ ပဵၼ်တွၼ်ႈတႃႇၵူၼ်းၼုမ်ႇႁဝ်းၶဝ် ပေႃးတေၸၢင်ႈၸႂ်ႉတိုဝ်း ပႆၢးဝူၼ်ႉၺၢၼ်ႇပိင်ႇၺႃႇသေ တမ်းဝၢင်းၶေႃႈတႅပ်းတတ်း ၵဵဝ်ႇလူၺ်ႈပၢႆးယူႇလီ လွင်ႈၸၢႆးယိင်းလႄႈသင်၊ တႃႇၽိူမ်ႉထႅမ်ပၼ်ႁႅင်းလွင်ႈပိုၼ်ႉႁူႉပၢႆးမေႃလႄႈ တိုၼ်းလၢင်းၶေႃႈမုၼ်းၸိူဝ်း ၼၼ်ႉလႂ်ယူႇယဝ်ႉ။

ၽွင်းမိူဝ်ႈတႄႇ ပိုၼ်ၽႄၵႂႃႇ “Change” ဢႅ ပ်ႊပလီႊၵေႊသျိၼ်ႊ ၼႆႉ ႁၼ်လွင်ႈၶိုၼ်ႈယႂ်ႇတီႈ ၵူၼ်းၸႂ်ႉတိုဝ်း လႄႈ လွင်ႈတုမ်ႉယွၼ်ႈလီၼိူဝ် ၽူႈပၼ်ႁႅင်းႁဝ်းၼၼ်ႉယဝ်ႉ။ ၼႂ်းၶၢဝ်းတၢင်းသၢမ်လိူၼ်ၼႆႉ မီႈၵူၼ်း download 50 ၵေႃႉ လႄႈ ၵူၼ်း share မီးပဵၼ်  100 ၵေႃႉသေ ပဵၼ်ဢႅပ်ႊ ဢၼ်ၶဝ်ႈပၵ်းၶဝ်ႈပိူင် တီႈၼႂ်းၵႄႈ ၵၢၼ်ပၼ်တၢင်းႁူႉ ၽၢႆႇၸၢႆး/ယိင်းၼၼ်ႉယဝ်ႉ။

ထိုင်တေႃႈလဵဝ်  ပၢႆးယူႇလီၽႄႈတိူၼ်းၼႆႉ တိုၵ်ႉမီးၸိူဝ်းဢၼ်ဢမ်ႇႁၼ် ၽွၼ်းလီမၼ်းယူႇ။ ယွၼ်ႉၼၼ် တႃႇပၢၼ်သိၵ်ႉႁိၵ်ႉ တေယိုၼ်းထိုင်ဢဝ် တၢင်းႁူႉပၢႆးယူႇလီ လႄႈ တၢင်းႁူႉၽႄႈတိူၼ်းၸိူဝ်းၼႆႉၵေႃႈ တေမီးတၢင်းယၢပ်ႇဝႆႉ။ တႃႇတေမူၼ်ႉမႄး လွင်ႈပွင်ႇၸႂ်ၽိတ်းၼိူဝ် ပၢႆးယူႇလီၼႂ်း တူင်ႇတီႈၸိူဝ်းၼၼ်ႉ လႄႈ တႃႇပၢၼ်သိၵ်ႉႁိၵ်ႉ လဵပ်ႈႁဵၼ်းလႆႈ တၢင်းႁူႉဢၼ်ၵဵဝ်ႇလူၺ်ႈ လွင်ႈၽႄႈတိူၼ်းၼၼ်ႉၼႆ လုၵ်ႉတီႈ “Change mobile application” ၼၼ်ႉသေ သပ်းလႅင်းဝႆႉယူႇယဝ်ႉ။

ပၢင်ၵပ်းသိုပ်ႇ “Change moblie application” ၼႆႉ ၸတ်းႁဵတ်းတီႈ ၸုမ်းၵူၼ်းၼုမ်ႇတႆး(TYO) ၼႂ်းပီ 2023.Oct ၼၼ်ႉသေ တေမီးပၢၼ်သိၵ်ႉႁိၵ်ႉ လႄႈ ၽူႈၸိူဝ်းႁဵတ်းၵၢၼ်ၼႂ်း ပၢႆးယူႇလီၵေႃႈ ၶဝ်ႈပႃးၸွမ်း။ ပၢင်ပွႆးယဝ်ႉ ၶေႃႈမုၼ်းဢၼ်လႆႈမႃးလိုၼ်းသုတ်းၼႆႉ ‘Change’ ဢႅပ်ႊၼႆႉ မီးမႃးၵူၼ်း download (200) ပႃးၸဵမ် ပိုၼ်ၽႄၼွၵ်ႈဢွၼ်ႇလႅင်း ၸိူင်ႉၼင်ႇ zapya လႄႈတၢင်ႇၸိူဝ်းတႄႉတေမီးယူႇ (500) ပၢႆယူႇယဝ်ႉ။ ႁူဝ်ၼပ်ႉၸိူဝ်းၼႆႉ ၼႄဝႃႈ ပၢၼ်သိၵ်ႉႁိၵ်ႉ လဵပ်ႈႁဵၼ်းလႆႈငၢႆႈမႃးလႄႈ ၶေႃႈမုၼ်း ပၢႆးယူႇလီၸၢႆး/ယိင်းၵေႃႈ တဵမ်ထူၼ်ႈဝႆႉယဝ်ႉ။

ဢၼ်ဝႃႈ “Change” ဢႅပ်ႊၼႆႉ မီးတၢင်းၶဝ်ႈတိုဝ်း တႃႇတူင်ႇၵူၼ်းတင်းၼမ်လႄႈ တႃႇသုၼ်ႇတူဝ်ၸိူဝ်းဢၼ်ၸႂ်ႉတိုဝ်းဝႆႉယူႇၵေႃႈ မီးၵႃႈၶၼ်ဝႆႉသေ တၢင်းလူဝ်ႇပၢၼ်သိၵ်ႉႁိၵ်ႉ ဢၼ်လႂ်ဢၼ်ၼၼ်ႉတေႉၵေႃႈ ၵုမ်ႇထူၼ်ႈဝႆႉယူႇယဝ်ႉ။ “Change” ဢႅပ်ႊၼႆႉ ၶဝ်ႈပႃးၶေႃႈမုၼ်း ဢၼ်ပၢၼ်သိၵ်ႉႁိၵ်ႉ ၵိုင်ႇလီႁူႉၼင်ႇ ၽွင်းႁွမ်းသွင်, ႁႄႉၵင်ႈပႃးတွင်ႉ, ႁႄႉၵင်ႈတၢင်းပဵၼ်လႄႈ လွင်ႈၵပ်းသၢၼ်ဢၼ်ယူႇလီၼၼ်ႉယဝ်ႉ။ လိူဝ်သေၼၼ်ႉ ၸိူဝ်းတိုဝ်းဢႅပ်ႊဝႆႉယူႇၼၼ်ႉ ၸၢင်ႈထၢမ်လႆႈၶေႃႈထၢမ် ဢၼ်ၵဵဝ်ႇၵပ်းတင်း  ပၢႆးယူႇလီပၢၼ်သိၵ်ႉႁိၵ်ႉသေ  ဢၼ်ပဵၼ်ၶေႃႈထၢမ်ၼၼ်ႉ ၵေႃႈပဵၼ်သုၼ်ႇတူဝ်ႁူႉၵူၺ်းယူႇယဝ်ႉ။ ပွင်ႇဝႃႈ ပေႃးၶႂ်ႈထၢမ်ၶေႃႈထၢမ်ၼႆ ဢမ်ႇတၢပ်ႈလူဝ်ႇသွင်း ဝႂ်ၾၢင်သေဢမ်ႇၵႃး ၶေႃႈမုၼ်းသုၼ်ႇတူဝ်ၵေႃႈ တမ်းၸႂ်လႆႈယူႇ။

ၼႂ်း “Change” ဢႅပ်ႊၼႆႉ ယိူင်းဢၢၼ်းတႃႇပိုၼ်ၽႄ တၢင်းႁူႉပၢႆးယူႇလီၸၢႆး/ယိင်း  ႁႂ်ႈလႆႈႁၢၼ်ၵူႊၽၢႆႇၽၢႆႇၼၼ်ႉသေ  တႃႇၵူၼ်းၸႂ်ႉတိုဝ်းၵေႃႈ ႁႂ်ႈလႆႈၸႂ်ႉတိုဝ်းလႆႈ ငၢႆႈငၢႆႈၼၼ်ႉယဝ်ႉ။ ၵူၼ်းၸႂ်ႉတိုဝ်းမၼ်းၵေႃႈ ဢိင်ၼိူဝ်ၵၢင်ၸႂ်ႁဝ်းယဝ်ႉ လိူၵ်ႈလႆႈ ၽၢႆႇ (တႆး၊ဢၢင်းၵိတ်း၊မၢၼ်ႈ) သေ သွၵ်ႈႁႃၶေႃႈမုၼ်း ပၢႆးယူႇလီၸၢႆး/ယိင်း ပၢၼ်သိၵ်ႉႁိၵ်ႉလႄႈ  ပၢႆးယူႇလီၵၢၼ်ၽႄႈတိူၼ်း(ASRH) ယူႇ။ ယဝ်ႉၵေႃႈ ၸိူဝ်းၸႂ်ႉတိုဝ်းဢႅပ်ႊၼၼ်ႉ လိူဝ်သေတၢင်းႁူႉ ASRH သေ ဢမ်ႇၵႃးလဵပ်ႈႁဵၼ်းလႆႈ တၢင်းႁူႉၸိူဝ်းပၢၼ်သိၵ်ႉႁိၵ်ႉၵိုင်ႇလီႁူႉၼၼ်ႉယဝ်ႉ။

ႁူဝ်ႁုပ်ႈမၼ်းၼႆ ၶွင်ၸုမ်းၵူၼ်းၼုမ်ႇတႆး  “Change” မူဝ်ႇပႂၢင်း ဢႅ ပ်ႊပလီႊၵေႊသျိၼ်ႊၼႆႉ ပဵၼ်ဢဵၼ်ႁႅင်း  တွၼ်ႈတႃႇၵႄႈလိတ်ႈလွင်ႈၶဵင်ႇတႃႉ လွင်ႈၸၢႆး/ယိင်းလႄႈ လွင်ႈၽႄႈတိူၼ်း ပၢၼ်သိၵ်ႉႁိၵ်ႉ တႃႇသိုပ်ႇၵႂႃႇ တၢင်းၼႃႈၼၼ်ႉယဝ်ႉ။ တွၼ်ႈတႃႇလတ်းၽၢၼ်ႇ လွင်ႈႁႄႉၵင်ႈ တူင်ႇဝူင်းၵူၼ်းလႄႈ ၶေႃႈမၼ်ႈၵႅၼ်ႇ ႁႂ်ႈသိုပ်ႇမၼ်ႈလီၼႆ “Change” ဢႅပ်ႊၼႆႉ သိုပ်ႇၵမ်ႉထႅမ်ပၼ်

ႁႂ်ႈလႆႈတၢင်းႁူႉ ဢၼ်တေၸၢင်ႊၶဝ်ႈတၢင်းတိုဝ်း မိူဝ်ႈႁဵတ်းၵၢၼ်တႅပ်းတတ်းၼိူဝ် ပၢႆးယူႇလီၸၢႆး/ယိင်းၼၼ်ႉယဝ်ႉ။ မိူဝ်ႈႁဝ်းသိုပ်ႇယၢင်ႈၵႂႃႇ တၢင်းၼႃႈၼၼ်ႉ ၽွၼ်းလီဢၼ်”Change”ဢႅပ်ႊပၼ်ၼၼ်ႉ တေပဵၼ်ဢၼ်ၶၢဝ်းယၢဝ်းၵိုၵ်ႉပိုၼ်းၵႂႃႇလႄႈ တေသိုပ်ႇပဵၼ်ဢႅပ်ႊ ဢၼ်ပၼ်တၢင်းႁူႉပၢၼ်သိၵ်ႉႁိၵ်ႉ ႁႂ်ႈပဵၼ်ၸူဝ်ႊပၢၼ် ဢၼ်တိူဝ်းလီၼၼ်ႉယဝ်ႉ။

“Change“ ဢႅပ်ႊပလီႊၵေႊသျိၼ်ႊ

ၸုမ်းၵူၼ်းၼုမ်ႇတႆး