ၵူၼ်းၼုမ်ႇလႄႈၵႃႈၶၼ်ၽဝၸၢတ်ႈပၢၼ်
ဢူၺ်းၵေႃႉႁဝ်းၶဝ်ႁိူၺ် …
တမ်ႈတီႈၵူၼ်းၼုမ်ႇသႅၼ်းပၢၼ် “သိၵ်ႉႁိၵ်ႉ” ၶဝ်ၼၼ်ႉ လွင်ႈဝႆႉၵႃႈၶၼ်ၼႆႉ မီးဝႆႉလၢႆလၢႆလွင်ႈယူႇယဝ်ႉ။
ၵေႃႉၼိုင်ႈလႄႈၵေႃႉၼိုင်ႈ လွင်ႈဝႆႉၵႃႈၶၼ်ၸၢင်ႈမိူၼ်ၵၼ်သေတႃႉ၊ ၵမ်ႈၽွင်ႈၵေႃႈတေၸၢင်ႈပႅၵ်ႇပိူင်ႈၵၼ်
ယူႇယဝ်ႉ။
လွင်ႈဢၼ်ၵူၼ်းၼုမ်ႇၶဝ်ဝႆႉၵႃႈၶၼ်ၵမ်ႈၽွင်ႈၼၼ်ႉတႄႉ …
- ပၢႆးပိင်ႇၺႃႇ
- လွင်ႈငိုၼ်းတွင်း
- ပေႃႈမႄႈ
- ၶၢဝ်းယၢမ်း
- ဢူၺ်းၵေႃႉဢူၺ်းသႄႈ
- ပၵ်းပိူင်
- လွင်ႈၵျေႃႇလွင်ႈမူၼ်ႈ
- ၾိင်ႈယၢမ်ႈလွင်ႈတိုဝ်းၵမ်
- ယိူင်းဢၢၼ်း
- ၼႃႈၵၢၼ်တႃငၢၼ်း
- လွင်ႈတၢင်းႁၢင်ႈလီ ၸိူဝ်းၼႆႉယဝ်ႉ။
ၵူၼ်းၵေႃႉဢၼ်ဝႆႉၵႃႈၶၼ်ပၢႆးယူႇလီၼၼ်ႉ တေဝႄႈလွင်ႈႁဵတ်းသၢင်ႈဢၼ်ၸၢင်ႈတုမ်ႉတိူဝ်ႉပၢႆးယူႇလီ မိူၼ်ၼင်ႇ – ၵိၼ်လဝ်ႈ (သူႇရႃႇ)၊ လုတ်ႇလႅၼ်းယႃႈ ၸိူဝ်းၼၼ်ႉယူႇယဝ်ႉ။ ၵူၼ်းၵေႃႉၼိုင်ႈၼႆႉ တူၺ်းလွင်ႈႁဵတ်းသၢင်ႈမၼ်းသေ ႁူႉထိုင်လႆႈဝႃႈ မၼ်းဝႆႉၵႃႈၶၼ်ၼိူဝ်လွင်ႈသင်ၼႆယူႇယဝ်ႉ။
ၵူၼ်းၵေႃႉဢၼ် ႁဵတ်းၵၢၼ်တႅတ်ႈတႅတ်ႈၼႅတ်ႈၼႅတ်ႈၸွမ်းၶၢဝ်းယၢမ်းၼၼ်ႉ လွင်ႈဝႃႈမၼ်းဝႆႉၵႃႈၶၼ်ၼိူဝ်ၶၢဝ်းယၢမ်းၼႆ ႁူႉထိုင်လႆႈယူႇယဝ်ႉ။
ၵူၼ်းၼုမ်ႇၸိူဝ်းဢၼ်ဢဝ်ၵၢင်ၸႂ်ၸဝ်ႈၵဝ်ႇ (ပိဝ်လွင်ႈ) ၸွမ်းလင်ဢၼ်ပိူၼ်ႈဝႆႉၵႃႈၶၼ်ၼၼ်ႉသေ ဢမ်ႇမေႃဝႆႉၵႃႈၶၼ်ၼိူဝ်တူဝ်ၵဝ်ႇၶိုၼ်းၼၼ်ႉၵေႃႈၸၢင်ႈမီးယူႇယဝ်ႉ။ ၼင်ႇၼၼ်သေ ယွၼ်ႉၵူၼ်းၼႂ်းၼႃႈႁိူၼ်း (ဢမ်ႇၼၼ်)တူင်ႇဝူင်းႁိမ်းႁွမ်းသုမ်ႇငမ်းလႄႈ ႁဵတ်းႁႂ်ႈလွင်ႈဝႆႉၵႃႈၶၼ်လႅၵ်ႈလၢႆႈၵႂႃႇၸိူဝ်းၼၼ်ႉၵေႃႈမီးယူႇယဝ်ႉ။
လွင်ႈဝႆႉၵႃႈၶၼ်ၵမ်ႈၽွင်ႈၼႆႉ ဢိင်ၼိူဝ်သႅၼ်းပၢၼ်ဢႃႇယူႉ၊တူဝ်ထူူပ်းတႃႁၼ်၊ လွင်ႈၵႄႇထူၼ်ႈပေႉတူဝ် လႄႈ တူင်ႇဝူင်းႁိမ်း ႁွမ်းသေ ၸၢင်ႈလႅၵ်ႈလၢႆႈလႆႈယူႇယဝ်ႉ။
- ပိူင်တႅၵ်ႈမၼ်း ၵူၼ်းၼုမ်ႇၵမ်ႈၽွင်ႈၼႆႉယွၼ်ႉဢူၺ်းၵေႃႉႁူၺ်းသူၼ်းသေ တႅၼ်းတီႈတေဝႆႉၵႃႈၶၼ်
ၼိူဝ်ပၢႆးပိင်ႇၺႃႇ သမ်ႉၵႂႃႇဝႆႉၵႃႈၶၼ်ၼိူဝ်လွင်ႈၵျေႃႇမူၼ်ႈ ဢၼ်ဢမ်ႇထုၵ်ႇလီဝႆႉၵႃႈၶၼ်ၸိူဝ်းၼၼ်ႉ
ၵေႃႈ လႆႈႁၼ်ယူႇယဝ်ႉ။ - ႁဵတ်းၸိူင်ႉၼၼ် ၵူၼ်းၼုမ်ႇဢၼ်ဝႆႉၵႃႈၶၼ်ၽိတ်းပိူင်ႈၼၼ်ႉၵေႃႈလႆႈပႆမႅၼ်ႈသဵၼ်ႈတၢင်းၽိတ်းပိူင်ႈ
ၵႂႃႇသေ ပၼ်ႁႃဢၼ်ပဵၼ်ၵိုၵ်းၸွမ်းၽၢႆႇလင်တႄႉ ပဵၼ်လွင်ႈတုမ်ႉတိူဝ်ႉ ပၢႆးယူႇလီ၊ ပၢႆးပိင်ႇၺႃႇ၊
ပၢႆးတူင်ႇဝူင်းၵူၼ်း လႄႈ ပၢႆးမၢၵ်ႈမီး ၸိူဝ်းၼၼ်ႉယဝ်ႉ။ - ၵမ်းလိုၼ်းသုတ်း ထိုင်တီႈတၢင်းယိူင်းဢၢၼ်းၽဝၸၢတ်ႈပၢၼ် ၸၢင်ႈႁၢႆလၢႆလူႉလႅဝ်ၵႂႃႇယူႇယဝ်ႉ။
ၼႂ်းၸၢတ်ႈပၢၼ်ၵူၼ်းၼုမ်ႇၼၼ်ႉသင်ဝႃႈထိင်းသိမ်းလွင်ႈဝႆႉၵႃႈၶၼ်ထုၵ်ႇမႅၼ်ႈၸိုင်လွင်ႈလိူၵ်ႈသဵၼ်ႈတၢင်းၵေႃႈတေထုၵ်ႇမႅၼ်ႈသေ တေပဵၼ်လွင်ႈၵမ်ႉၸွႆႈတွၼ်ႈတႃႇၽဝၸၢတ်ႈပၢၼ်ယူႇယဝ်ႉ။
လိူၵ်ႈထတ်းတူၺ်းလွင်ႈဝႆႉၵႃႈၶၼ်ၸဝ်ႈၵဝ်ႇတႅတ်ႈတႅတ်းတေႃးတေႃးသေ လူဝ်ႇလႆႈၶတ်းၸႂ်ယူႇသဝ်းၸွမ်း
ၼင်ႇဢၼ်ႁဝ်းဝႆႉၵႃႈၶၼ်ဢၼ်ဝႃႈၼၼ်ႉ ယႃႇပေလိုမ်းၼႃႈ …
တေၶိုၼ်းသိုပ်ႇလၢတ်ႈၼႄဝႃႈ ပေႃးၵိူဝ်ႉလဵၼ်ႈၶူဝ်မႅၼ်ႈ ၼိူဝ်လွင်ႈဝႆႉၵႃႈၶၼ်ၵူၼ်းတၢင်ႇၵေႃႉၸိုင်
တေၸၢင်ႈႁဵတ်းႁႂ်ႈပဵၼ်လွင်ႈယႃႉလူႉသရေႇၼႃႈတႃၵၼ်ယူႇယဝ်ႉ။