လွင်ႈၸပ်းတွင်ႉပႃးသၼ်ႇထေႇ ၽွင်းပႆႇထိုင်ပၢၼ် (ၸပ်းတွင်ႉပႃးသၼ်ႇထေႇၸဝ်ႉ)
လွင်ႈၸပ်းတွင်ႉပႃးသၼ်ႇထေႇ ၽွင်းပႆႇထိုင်ပၢၼ် (ၸပ်းတွင်ႉပႃးသၼ်ႇထေႇၸဝ်ႉ)
ဢူၺ်းၵေႃႉႁဝ်းၶဝ်ႁိူၺ်…
ႁဝ်းၸိူဝ်းၼႆႉ ၼင်ႇသူၶဝ်ႁူႉဝႆႉၼၼ်ႉယဝ်ႉၶႃႈ ထိုင်ပၢၼ်ဢၼ်ႁၢမ်ႁၢပ်ႇပုၼ်ႈၽွၼ်းၽႄႈတိူၼ်းၸိူဝ်ႉၽၼ်း
လႆႈယဝ်ႉလႄႈ ႁၢတ်ႈႁၢႆးမၢဝ်ႇသၢဝ်ႁဝ်းၼႆႉ လူၺ်ႈလွင်ႈၸႂ်ၶုၺ်ႉႁၼ် (ၶၢမ်ႇၸႃး) လႄႈ လွင်ႈဢၼ်ၵူၼ်း
ယူႇၸမ်ၸိမ်ႁိမ်းႁွမ်းႁူၺ်းသူၼ်းၸိူဝ်းၼၼ်ႉသေ သင်လႆႈႁွမ်းသွင်လူၺ်ႈလွင်ႈဢမ်ႇပႃးလွင်ႈၵႅတ်ႇၶႄ
ႁႄႉၵင်ႈသင်ၼႆၸိုင် ၸၢင်ႈထူပ်းၺႃးပၼ်ႁႃ ၸပ်းတွင်ႉပႃးသၼ်ႇထေႇ ၽွင်းပႆႇထိုင်ပၢၼ်၊ ၽွင်းပႆႇႁၢင်ႈ
ႁႅၼ်းတူဝ်ႈတၼ်းၽွမ်ႉၼၼ်ႉယူႇယဝ်ႉ။
ပေႃးဝႃႈႁဝ်းထူပ်းၺႃးပၼ်ႁႃၸိူဝ်းၼႆႉၸိုင် ၸၢတ်ႈပၢၼ်ႁဝ်းၼၼ်ႉ တေမီးတၢင်းမူၼ်ႈသိူဝ်းလႆႈယူႇႁႃႉ၊ လွင်ႈၸပ်းတွင်ႉပႃးသၼ်ႇထေႇၽွင်းပႆႇထိုင်ပၢၼ် ဢၼ်ဝႃႈၼၼ်ႉ မၢႆထိုင်ၽူႈယိင်းၸပ်းတွင်ႉပႃးသၼ်ႇထေႇ
ၽွင်းဢႃႇယူႉပႆႇထူၼ်ႈတဵမ် 18 ပီၼၼ်ႉယဝ်ႉ။
ဢူၺ်းၵေႃႉႁဝ်းၶဝ်ႁိူၺ်…
ပေႃးဝႃႈပဵၼ်မႃးလွင်ႈၸိူင်ႉၼႆၸိုင် တေၸၢင်ႈထူပ်းၺႃးပၼ်ႁႃလႄႈၽေးၶဵၼ် ၸိူင်ႉႁိုဝ်လၢႆလၢႆၼႆၼၼ်ႉ
မႃးတူၺ်းႁၢင်ႈတီႈတႂ်ႈၸိူဝ်းၼႆႉၼေႃႈ…
- ဢဝ်လွင်ႈယုမ်ႇယမ်ႁၼ်ထိုင်ပၢႆးတူင်ႇဝူင်းၵူၼ်းဝႃႈၸိုင် လႆႈၼႃႈလဵၵ်ႉတႃၼွႆႉၼႂ်းၵႄႈၵၢင်ပိူၼ်ႈ၊လႆႈထုၵ်ႇတၢင်းၵူၼ်းတင်းၼမ်ထၢင်ႇလဵၵ်ႉ။
- ပၢႆးပိင်ႇၺႃႇဢမ်ႇသုတ်းယဝ်ႉတူဝ်ႈထိုင်တီႈလႄႈ လွင်ႈယိူင်းဢၢၼ်းၵေႃႈ လႆႈႁၢႆလၢႆၵႂႃႇ။
- ယွၼ်ႉဢႃႇယူႇပႆႇထူၼ်ႈထိုင်သေ ၵဵဝ်ႇလူၺ်ႈၼႃႈႁိူၼ်းၼၼ်ႉ ဢမ်ႇမီးလွင်ႈပွင်ႇၸႂ်၊ တၢင်းႁူႉပႆႇၵႄႇထူၼ်ႈလႄႈ ပဵၼ်မႃးပၼ်ႁႃၽူဝ်မေးၽိတ်းၽႅၵ်ႇထဵင်မေႃးၵၼ်၊ ၼႃႈႁိူၼ်းၵေႃႈဢမ်ႇမူၼ်းလႆႈ။
- ယွၼ်ႉဢႃႇယူႇပႆႇထူၼ်ႈထိုင်သေ လွင်ႈတူဝ်ထူပ်းလဵၵ်ႉၵေႇဢေႇမၢင်လႄႈ လွင်ႈပၢႆးမၢၵ်ႈမီးယူပ်ႈယွမ်း၊ မီးလွင်ႈယၢပ်ႇၽိုတ်ႇလွင်ႈငိုၼ်းတွင်း၊ၼႃႈႁိူၼ်းၵေႃႈဢမ်ႇမူၼ်းလႆႈ။
ႁၢတ်ႈႁၢႆးၼုမ်ႇသၢဝ်ႁဝ်းၼႆႉ ယွၼ်ႉၵူဝ်လႆႈထူပ်းၺႃးပၼ်ႁႃၸိူဝ်းဢၼ်ဝႃႈမႃးၸိူဝ်းၼၼ်ႉလႄႈ မႆႈၸႂ်ၼႃႇ သေ ၵမ်းလိုၼ်း သုတ်း လႆႈယႃႉပႅတ်ႈသၼ်ႇထေႇ၊ ၸၢင်ႈမေႃပႆမႅၼ်ႈသဵၼ်ႈတၢင်းၽိတ်းယူႇယဝ်ႉ။
ပေႃးတေယႃႉပႅတ်ႈသၼ်ႇထေႇၸိူင်ႉၼၼ်ၵေႃႈ …
- လိူတ်ႈတူၵ်းၼမ်သေ ၸၢင်ႈပဵၼ်ၽေးတေႃႇသၢႆၸႂ်။
- မႅင်းတၢင်းပဵၼ်ၶဝ်ႈသေ ၵတ်းသၼ်ႇမီးလူမ်းၼၢဝ်၊ ၵႂ်ႈပွင်း၊ ၵၢင်းၶႅင်သေ လူႉတၢႆ။
- ႁူင်းလုၵ်ႈပွင်ႇသေ လူႉသုမ်းသၢႆၸႂ်။
- ၸၢင်ႈလႆႈထူပ်းလွင်ႈၽွၼ်းၸႃႉဢၼ်ဢမ်ႇၸၢင်ႈမီးလုၵ်ႈလႆႈထႅင်ႈ ၼႆလႂ်ၸိူဝ်းၼၼ်ႉယူႇယဝ်ႉ။
ဢမ်ႇၸႂ်ႈၸိူင်ႉၼၼ်သေ သင်သမ်ႉသိုပ်ႇပႃးသၼ်ႇထေႇၵႂႃႇၸိုင် …
- လိူၼ်ဝၼ်းပႆႇၵႄႇထူၼ်ႈသေ ၵိူတ်ႇဢွၵ်ႇမႃးလုၵ်ႈဢွၼ်ႇဢၼ်ၼမ်ႉၼၵ်းတူဝ်ဢမ်ႇတဵမ်။
- ႁႅင်းလိူတ်ႈဢေႇ၊ မဝ်းပၼ်ႇတႃလမ်။
- တွင်ႉၶူၼ်ႉတူၼ်ႉႁၢၵ်ႈ၊ တိၼ်၊ မိုဝ်း၊ ၼႃႈ ၵႂ်ႈပွင်း။
- ႁူဝ်ၸဵပ်းႁူဝ်ၵႅၼ်းလိူဝ်ႁႅင်း။
- သၼ်ႇထေႇပဵၼ်ၵွင်ႉသေ လူႉသုမ်းသၢႆၸႂ်။
- ၶၢဝ်းယၢမ်းယူႇၾႆးႁိုင်ယၢဝ်းသေ ထူပ်းတၢင်းယၢပ်ႇၽိုတ်ႇတင်းၼမ်တင်းလၢႆ။
- ၽွင်းယၢမ်းယူႇၾႆးၼၼ်ႉ လိူတ်ႈထွၵ်ႇ (ႁူဝ်ႈ) သေ လူႉသုမ်းသၢႆၸႂ်။
- “ႁူၵ်ႈ” ဢမ်ႇတူၵ်းၼႆလႂ် ၸၢင်ႈထူပ်းပၼ်ႁႃၸိူဝ်းၼႆႉယူႇယဝ်ႉ။
ၵွပ်ႈၼၼ် ယူႇတီႈႁၢတ်ႈႁၢႆးၼုမ်ႇသၢဝ်ၸိူဝ်းႁဝ်းသေ ၼင်ႇႁိုဝ်တေဢမ်ႇပဵၼ်လွင်ႈႁၢႆႉၸႃႉၸိူင်ႉၼင်ႇဝႃႈၼၼ်ႉ
ၸူဝ်ႈပႆႇပဵၼ်ၼႆႉ တႃႇၵႅတ်ႇၶႄႁႄႉၵင်ႈလူင်ႈၼႃႈၼၼ်ႉ ပဵၼ်ဢၼ်လမ်ႇလွင်ႈသုတ်းယူႇယဝ်ႉ။
တေလႆႈယူႇသဝ်းသေ ၵႅတ်ႇၶႄႁႄႉၵင်ႈၸိူင်ႉႁိုဝ် ပေႃးဝႃႈၼႆၸိုင်…
- ပေႃးပဵၼ်လႆႈ ၸူဝ်ႈပႆႇၵူပ်ႉၵူႈပဵၼ်ႁိူၼ်းၸွမ်းၵၼ်ၼၼ်ႉ ဝႄႈလွင်ႈႁွမ်းသွင်ၵၼ်လႄႈ။ ပေႃးဢမ်ႇဝႄႈလႆႈၵေႃႈ ၸႂ်ႉတိုဝ်းလၢႆးႁႄႉၵင်ႈသၼ်ႇထေႇတႃႉ။
- လူဝ်ႇလႆႈမီး ပိုၼ်ႉႁူႉပၢႆးယူႇလီ ဢၼ်ထုၵ်ႇမႅၼ်ႈ လႄႈ တိုဝ်းၵမ်ႁဵတ်းသၢင်ႈၸွမ်းတႃႉ။
- ဝႄႈယၢၼ် ယႃႈမဝ်းၵမ်၊ ယႃႈယႃဢၼ်ၸၢင်ႈလႅၵ်ႈလၢႆႈပၢႆးၸႂ် လႄႈ ၼမ်ႉလဝ်ႈသူႇရႃႇ ၸိူဝ်းၼၼ်ႉတႃႉ။
- လိူၵ်ႈႁႃ တူင်ႇဝူင်းၸမ်ၸိမ်ႁိမ်းႁွမ်းဢၼ်ၶႅမ်ႉလႅပ်ႈၼၼ်ႉလႄႈ။
ဝၢင်းတမ်းလိူၵ်ႈသဵၼ်ႈတၢင်းထုၵ်ႇမႅၼ်ႈၼင်ႇဝႃႈမႃးပႃႈၼိူဝ်ၼႆႉသေဢမ်ႇၵႃး ဝႄႈယၢၼ်ပႃးလွင်ႈႁဵတ်းသၢင်ႈ
ဢၼ်ၸၢင်ႈပဵၼ်ၽေးၶဵၼ်သေ ၵႅတ်ႇၶႄတူဝ်ၸဝ်ႈၵဝ်ႇလႆႈယူႇယဝ်ႉ။
ပေႃးၸိူင်ႉၼၼ်
ယူႇတီႈဢူၺ်းၵေႃႉႁဝ်းၶဝ်သေ လွင်ႈပၼ်ႁႃဢၼ်ၼိုင်ႈ ဢၼ်ၵႆႉၸၢင်ႈပဵၼ်ၽွင်းပၢၼ် “သိၵ်ႉႁိၵ်ႉ” ၼၼ်ႉၵေႃႈ ႁူႉပွင်ႇၸႂ်လီ ငၢမ်းယဝ်ႉၼေႃႈ…
ပေႃးပဵၼ်ပၼ်ႁႃၸိူင်ႉၼႆမႃးၸိုင် ၵမ်ႈပႃႈၼမ်ၼႆႉ ၵႆႉလႄႇတၢင်ႇတၢင်းၽိတ်း တီႈၼိူဝ်ၽူႈယိင်းၵူၺ်းယူႇယဝ်ႉ။ တီႈတေႉမၼ်း ပၼ်ႁႃဢၼ်ၼႆႉၼၼ်ႉ ဢမ်ႇၸႂ်ႈလႄႈဝႃႈ ယွၼ်ႉၵေႃႉၼိုင်ႈၽၢႆႇၼိုင်ႈၵူၺ်းသေ ပဵၼ်မႃးဢမ်ႇၸႂ်ႈသႄႈ။
ပဵၼ်ငဝ်ႈႁၢၵ်ႈလွင်ႈတၢင်းဢၼ် ၽူႈၸၢႆးၵေႃႈလီ၊ ၽူႈယိင်းၵေႃႈယႃႇ တေလႆႈဝႆႉၼမ်ႉၼၵ်းတေႉတေႉဝႃႈဝႃႈယူႇယဝ်ႉ။
ဢိုဝ်ႊ … ပေႃးၸိူင်ႉၼၼ် ႁဝ်းမႃးဢွၼ်ၵၼ်သိုပ်ႇလဵပ်ႈႁဵၼ်းထႅင်ႈ ပၼ်ႁႃဢၼ်ၸၢင်ႈပဵၼ်မႃးဝၢႆးလင်
လွင်ႈႁွမ်းသွင်ၼၼ်ႉထႅင်ႈ ဢၼ်ၼိုင်ႈၼေႃႈ…